隔牆有耳:教主病逝 創意要靠強國後繼 - 李八方
如果抄襲真係最大嘅讚美,全世界最景仰、敬重、欣賞蘋果教主喬布斯嘅,一定係強國,否則,唔會出現舉國山寨蘋果產品嘅盛況,而且A貨越來越精緻,有人甚至認為功能超越真正蘋果產品,成為另類科技成就,為咗向喬布斯致敬,八方同大家回顧幾件「超A貨」產品,悼念呢位偉人,悼念強國人民創意。
蘋果產品越來越精良,強國模仿能力亦步亦趨,「果迷」期待已久嘅iPhone5流產,不過內地富二代卻有辦法到手一部,呢部飛越未來嘅iPhone5,可能連喬布斯都冇攞到手。事實上對強國嘅生產商嚟講,生產iPhone可能已經冇乜挑戰性,去年底就有新機soPhone面世,未幾流入香港,呢部機有齊iPhone4功能,真貨冇嘅,佢都有,被譽為仿真度高達100%,連先達iPhone達人劉志剛都話:「呢部機真係無敵,好犀利。」
強國山寨蘋果產品有學習期,之前有部hiPhone,牌子叫「橘子」,擺明係向蘋果iPhone3G「致敬」之作。家睇呢部機,大家可能覺得不值一提,但幾年前真係驚艷登場。除咗向iPhone「致敬」,強國對iPad亦表示無限尊崇,iPed、A-Pad紛紛上架,呢啲山寨產品,連日本傳媒、《TIME》等國際媒體都有報道。
創新、創意可能唔係強國人民強項,不過畫蛇添足卻好耍家,八方有部iPodnano用嚟聽歌,強國廠商,竟然諗到加入打電話功能,推出iPodnanoPhone,點到你唔服!唔服?昆明有山寨AppleStore,成間蘋果店內內外外都係A貨,老外見到都五體投地,大國崛起,nothingimpossible。
喬布斯將不可能變成可能,有一種產品,八方恐怕佢生前聞所未聞,就係紙紮嘅sPhone同sPad,上台可能要用數冥通,呢啲A貨,真係唔死都冇用。
全球「蘋果教」信徒為教主離世傷心,facebook洗版洗到失控,拎住蘋果產品懷念教主嘅時候,八方希望大家唔好忘記佢哋──生產蘋果產品嘅工人。
蘋果產品主要生產商富士康,過去幾年不時發生工人自殺跳樓事件,「富士康連環跳」成為受關注嘅社會問題,好多人反思,高科技產品背後究竟犧牲咗幾多性命,拎住一件血汗工廠生產出嚟嘅血汗產品,真係咁潮咁型咁過癮?