譚小環老公蔡強榮（Eric）早前為治早期肺癌，切除右邊上下肺葉壞細胞，已康復出院，經過約兩個月治療休養，Eric身體都好轉。（新聞連結： http://bit.ly/2hyP0fP ）之前小環話想多啲二人世界，最近搵到時間去咗台灣旅行。

雖然香港去台灣航程只係短短要一小時多啲，但Eric都要得到醫生批准先敢出埠，佢仲將旅程照片po到facebook：「休遊歲月，第一擊，醫生話近近地好啦，台中台北，出發。」佢哋去咗台中探朋友，小環又喺朋友嘅咖啡店偷師學立體拉花，今日轉到台北食食食同shopping。

小環今日接受《蘋果》電話訪問時話：「我哋第一次去台中，去咗探朋友，佢開咗間咖啡店，有機會我都想喺台中開番間，真係唔錯。以前去台灣玩，趕住又食又買，今次慢活，主要行街食吓嘢，玩得比較放鬆。今日嚟到台北，比較凍，好有聖誕氣氛。」

Eric剛抗癌成功，所以遇上冷天氣都着夠保護衣物、頸巾，佢話：「病咗兩個幾月，今次病好出去玩，食得好開心，係咁食，肥咗幾磅，醫生叮囑要小心，不能冷病。」

更多娛聞，喺晒《娛果》
http://fb.com/appledailyent