錦興（275）對上星期五成交過2300萬股，係半年嚟最大成交一日，有鑊氣兼超落後，要。錦興07年5月高位19.85元，兩年嚟累跌95%，現價（0.87元）同沙士低殘價差無幾。同上星期推介嘅看通（1059）一樣，錦興月線圖14RSI都係得36，超賣嚴重，兼反映股價上年10月尋底後，冇點彈升過。以呢個低殘價計，相對集團3月供股後、反映埋攤薄效應計嘅NAV6.09元，折讓仍然高達86%，又係流晒口水。
錦興對上星期四公佈配股大計，若果集資順利進行，估計錦興手頭現金應該上到近8億銀。集團銀彈豐厚，進可攻、退可守。老實講，錦興作為殼王其中一隻上市旗艦，市值得番3.5億銀，業務係有壯大需要。以錦興現價翻半番到1.30元計，到時集團嘅NAV折讓仍然高達78%，實情仍然有大把炒收窄嘅空間。

香港華人實力取勝

香港華人（655）最新NAV2.57元，現價（0.70元）折讓，仲係超過70%。集團上年底揸住現金7.4億銀，扣埋銀貸，仲有淨現金1.5億銀，NAV折讓大兼係現金牛，講質素，絕對實力派。
力寶（226）系當中，力寶華潤（156）過去半年累積升幅55%，至於香港華人，半年打橫行，郁都未郁過，夠晒條件炒落後。就當短打，呢轉係咁意博升25%到0.875元，到時，香港華人折讓仍然高達66%，呢個折讓水位，實情安全到痹。
錢雋