同柯震東分手嘅蕭亞軒(Elva)被爆搭上細佢4歲、吳建豪太太石貞善細佬Elroy，發展「雙E戀」。

早前台灣蘋果日報影到佢哋由上海返台灣，當時追問Elva係咪拍拖﹖佢只笑笑口話：「不好意思，謝謝關心。」未有承認戀情。

之不過，台灣壹週刊就影到佢哋喺7月10日下晝，喺上海機場登機前，目擊到Elroy為Elva推行李，又有親密嘅互動，Elroy仲拎住Elva護照辦理登機手續，又負責將行李放到行李帶上，其實橙色Hermes行李喼正正就係Elva嘅；當過海關時，雖然係小小嘅分開，但Elroy眼神已經離不開Elva。

直至抵達松山機場，Elroy攞行李嘅時候都未見Elva，過咗7分鐘，Elva就拖住橙色Hermes行李喼出嚟上自己車，過咗50分鐘，Elroy終於出嚟上車離開機場，直駛Elva香閨附近嘅一間酒店停車場內。

Elva經理人蔣承縉就「雙E戀」只謂：「藝人私事不回應。」Elroy嘅家族喺新加坡經營棕櫚油事業，上年喺富比士排行榜新加坡前50大富豪排第43名，資產達4.3億美元，為咗創造自己事業，目前喺杭州從事城市開發。