𠵱家啲投資者越來越清醒,唔會邊個話買就入市掃貨,邊個睇淡就沽貨,個別人士仲已經被標籤為「燈」,跟佢所講嘅方向,調番轉做就啱。加上掛牌冇耐嘅徽商銀行(3698)喺招股時,傳過獲著名投資者索羅斯入飛,轉頭又傳佢抽飛,根本冇人知索羅斯究竟有冇落過飛,還是只係被人用作宣傳。
據了解,兆基財經冇入股旭輝。旭輝前日成交的確顯著增加,由平均每日大約1,000萬股成交,急增至2.57億股,肯定係有人大手掃貨,但就並非四叔。
不排除因為恒地今年7月跟旭輝合作發展杭州一個地產項目,旭輝主席林中早前又放晒風,指未來香港地產商跟內房合作係一種趨勢,佢都有意同恒地多啲合作,又讚四叔長子李家傑係好努力嘅人。講講吓,市場就將兩件事串連一齊都未定。
有趣嘅係,市傳呢位投資者入股旭輝4%,聯交所要求持股量逾5%先要披露,呢位投資者如果冇繼續增持,市場就唔知佢係乜水,簡言之,𠵱家話佢係邊位都得。
近期名人效應最有效,應該係思捷(330),主席柯清輝披露上月30號增持後,股價係咁升,噚日又升3.7%嘞。
李華華
mailto:
[email protected]