豬流感疫苗面世冇耐，打完有癱瘓嘅風險，香港人唔想做白老鼠，因此就算有免費針打都要諗過先。為免浪費買疫苗公帑，特首煲呔效神農氏嚐百草，噚日率領一班高官同醫護界猛人合演打針騷，率先接種疫苗，簽埋「生死狀」，場面悲壯不已。
65歲嘅煲呔屬感染豬流感高危人士，聯同教育局局長孫公、食衞局局長周一嶽齊齊打針；衞生防護中心總監曾浩輝、醫管局質素及安全總監梁栢賢都要上陣，醫學會會長謝鴻興、西醫工會會長楊超發、兩間大學醫學院院長則做人肉佈景板，輪流被人打。

拮針時煲呔表情僵硬

由於打針後隨時有後遺症，如果煲呔有異常反應，就要按《基本法》條文換特首，因此噚日場打針大騷全城矚目，電視台全程直播。煲呔到場時表現輕鬆，見到大量記者時笑言「乜咁墟冚呀！」有記者問佢緊唔緊張，佢話唔怕痛，「又唔係BB仔。」
話雖如此，當護士支針拮到肉時，煲呔表情頓時僵硬，又不自覺數吓場內有幾多部相機，似在分散注意力令自己唔覺痛。煲呔捱完打，同護士講，「幾好手勢，完全唔痛，工多藝熟。」轉過頭笑笑口同周一嶽講：「輪到你嘞。」
呢場打針騷一大看點，係畀大家見到高官平日甚少曝光嘅肉臂。現場所見，煲呔手臂肥美，孫公就白淨，可惜兩人手臂肌肉略為鬆弛，相信同平日少運動有關；周一嶽係羽毛球同壁球高手，手瓜起，62歲都有一雙麒麟臂；至於曾浩輝，臂如其人都係了了瘦瘦，但睇落幾結實。之前盛傳會一齊打針嘅醫管局主席胡定旭噚日冇現身，唔係怕痛縮沙啩？

特首若有重病須辭職

做騷真係打針都冇咁快，煲呔事後話打針快趣、順利，呼籲屬高危組別市民盡快打針，周一嶽就話唔係做騷，只係要畀市民一個訊息，盡快接種疫苗。注射疫苗後如果有不正常反應，一般喺兩日內有副作用，而《基本法》第52條寫明，特首因重病不能履行職務就要辭職，因此有理由相信呢兩日全個政府，甚至北京都密切注視煲呔情況，一旦出狀況就要煲呔加入總辭，明年一併舉行補選。
mailto:[email protected]

睇肉臂估高官

註：謎底在左圖