韓國神劇《太陽的後裔》女星宋慧喬上周四襲港出席品牌活動，逗留三日兩夜就返回韓國。喬妹返韓後就立即孖住演員老公宋仲基去日本旅行，噚日更被粉絲捕獲。

據悉雙宋噚日晏晝行街時已經被捕獲到，兩人更大方為粉絲簽名。同日晚上亦有粉絲捕獲到雙宋食飯。據該粉絲表示自己喺六本木某餐廳偶遇雙宋，當時宋仲基並唔係坐喺位上，所以佢大膽上前向對方拎簽名，宋仲基亦親民冇托手踭，粉絲又大讚兩人好登對。該粉絲亦表示喬妹當時正食緊嘢所以冇行去打擾佢，貼心舉動獲其他粉絲大讚。

更多韓流，喺晒《娛果》
http://fb.com/appledailyent