曾獻唱人氣韓劇《鬼怪》OST、現年28歲嘅女歌手Ailee，佢噚日喺Instagram發文大吐苦水，指自己半夜受到電話騷擾。

原來佢凌晨1時多就收到電話騷擾，對方來電問呢個電話號碼係唔係Ailee，對此Ailee大感不滿，更反問如果佢公開對方嘅電話號碼，其他人亦都可以半夜打電話畀對方，咁對方嘅心情又會如何？

網民及粉絲得知Ailee被電話騷擾後，即提議佢改電話號碼，不過Ailee就呻每次改完電話號碼，佢哋都會搵到辦法查到佢嘅新號碼，亦都繼續半夜打電話畀自己，令佢飽受困擾。

有網民就指呢啲行為並唔係粉絲所為，又估計係嗰啲瘋狂嘅粉絲「私生飯」所做，亦希望一眾粉絲唔好再騷擾偶像，等佢哋都可以過正常人嘅生活。