湯怡同導演劉偉恒噚晚連走兩場，分別現身奧海城及圓方出席電影《某日某月》明星開畫場同慈善首映。電影日前正式上映，湯怡話屋企人都有嚟捧場：「我仲見到媽咪睇到眼濕濕。」

湯怡又話戲中有啲情節令自己勾起好多讀書時期回憶：「小學暗戀咗一個男仔好耐，到升中學前把握最後機會，家姐教我寫信表白，但又話唔可以太直接，於是就寫歌詞，用咗《其實你心裡有沒有我》憑歌寄意，但結果對方完全零反應。」

第一次主動出擊被拒後，湯怡自言唔開心咗幾個月，直到升中後就算有喜歡嘅對象都唔敢主動表白：「試過有一個鍾意嘅男同學，以前成日睇佢打藍球，但到第一次約會，佢同我講呢一晚係我最開心嘅一晚，聽到有啲驚有啲抗拒，之後就冇再繼續。」至於導演劉偉恒話曾經試過喺台上唱歌俾女仔聽，又試過寫情信，但可惜統統都失敗收場。

精選娛聞，喺晒《娛果》
http://fb.com/appledailyent