方力申今日同女友鄧麗欣（Stephy）全黑情侶裝打扮賀康仔結婚，兩人異口同聲話康仔要求高，所以都係最實際帶禮金到。其間小方扮記者問女友將來想在香港搞定外國，兩個人打情駡俏咁，Stephy問小方點解佢會問埋一份，然後話自己想去歐洲，但小方抵死話打算去鴨脷洲，Stephy就話其實長洲都Ok。

記者問小方儲老婆本儲成點，佢好衰咁話一個人嘅積分都有（機票），Stephy笑言自己機票惟有自己儲。

任賢齊同老婆Tina一齊到，佢話老婆好少去呢啲場合，但康仔係公司嘅人，所以都要恭喜吓。問小齊會否灌醉康仔，佢話康仔唔知會唔會醉到行唔到去佢嗰枱敬酒。

康仔話下年會造人，小齊笑謂台灣公司嗰邊有隻補身體藥方，可以介紹畀佢，係叫「水魚精」:「好到不得了，我都有食過。」咁係咪想再生？小齊即刻話:「唔使，一個就夠。」