韓國綜藝節目《RunningMan》主持兼男子組合Leessang成員Gary，今年一月時曾於網上大呻拎唔到版權費，噚日，Gary再度發火，於facebook上留言：「真想掀地板，因為壓力，好似壽命都要縮短啦。」似乎已經因為版權費問題而忍無可忍。

據知，韓國著作權協會將頒佈新嘅收益分配方式，新制度下，歌曲具體嘅使用時間將不被記錄，即代表電視台播放音樂時，音樂製作人嘅版權費將直線下降。

今年初Gary已曾因個別歌曲、約35億韓圜（約2,350萬港元）版稅未結算嘅問題而提出不滿。

對此，韓國著作權協會回應：「當初未結算嘅35億韓圜（約2,350萬港元）版稅已經分成4、5、6月份進行結算，而未結算嘅部分將親自向Gary道歉。」之後又表示：「專輯嘅收入每個月都有支付，節目演出費用係長時間定期支付嘅，而海外嘅版稅則係一年一次支付，如果有唔舒服嘅地方，我哋會直接道歉，我哋一直改善，雖然步伐有啲緩慢，都會繼續努力。」