【新增內容】47歲嘅日本影后中山美穗到o依家都係好多人心目中嘅女神，日本CS頻道最近重播美穗夥拍織田裕二嘅1991年電影《只想擁抱着無數波浪》，重溫佢當年黑到成個南亞裔嘅膚色，同現時主張美白嘅佢簡直判若兩人。

美穗三年前同作家丈夫辻仁成離婚，更被指拋夫棄子搭上肥仔音樂人姦夫澀谷慶一郎，令美穗形象一度跌至新低。美穗同澀谷慶一郎分手後，其感情似乎未有着落，早前拍罷富士電視台「月9」檔劇集《貴族偵探》之後更十分清閒，只為雜誌影吓寫真做吓訪問咁，噚日佢就喺Instagram公開早前到峇里嘅靚相，正當fans正期待偶像有乜新動向，美穗透過Twitter話今日將有「情報解禁」，意思即係將有一項消息會公開，令廣大影迷十分期待。

今日下午，消息終於公開，原來係美穗相隔5年接拍新片《如蝴蝶般沉睡》，片中佢飾演一名患有阿茲海默氏症嘅女作家，並戀上一名韓國留學生嘅故事，男主角係韓劇《咖啡王子》男星金材昱，電影喺日本拍攝，將於明年春天喺日韓兩地同時上映，更會亮相下月舉行嘅釜山國際電影節。