《那夜凌晨，我坐上了旺角開往大埔的紅van》呢套電影，未上映嘅時候，網民一致期待，睇完預告，大家就仲興奮，不停咁話想快啲睇。喺前日，套戲終於上映咗，截至噚日，已經有成400萬票房，非常叫座，呢兩日喺唔同嘅討論區及fb，都有唔少網民評價呢套電影，但負評唔少。

網民嘅負評都嚟自好多唔同嘅角度，好似話兩個主角黃又南同JaniceMan未能發揮，配角仲搶戲過佢兩個；有人話要提名林雪做下一屆最佳男配角，而任逹華做嘅發叔，就發揮得好好，但就唔明加插惠英紅「神婆」一角嘅作用。

講到劇情，網民就話劇情較鬆散，笑點太多，令電影嘅懸疑感同緊張氣氛盡失；至於戲中留低嘅疑點，基本上未有冇解開，尤其是尾段，似是鋪路開拍續集，但網民就話唔敢太期待。

不過都有網民係讚套戲：「當笑片睇，真係好好笑，當cult片睇，都係好好睇。但係當小說改篇睇，睇前要做好心理準備。」也有人話：「陳果可以喺香港拍一套咁嘅戲出嚟，真係好勇敢，話晒香港觀眾嘅接受能力比較低，其實外國都有好多咁嘅cult片，成套都唔錯，只係同原作嘅偏僻太多。」

又有網民笑言，如果畀王家衛拍《紅van》嘅話會點，可能會係咁：「十六號，四月十六號。二零一一年四月十六號午夜兩時四十分我們上了一架紅VAN，因為你我會記住這一程紅VAN。從現在開始我們就是幾日的朋友，這是事實，你改變不了，因為已經過去了。我下一次紅van實驗會再來。」果真創意無限。