由吳京做主角嘅《戰狼2》，早前喺大陸上畫，喺事前一片唱衰嘅情況下，上映42日，累計票房超過55.8億人民幣，登上中國史上最高票房電影，並且打入年度全球票房十大電影之一，部戲o依家仲上緊，同時更擠身史上全球最高電影票房首100位，創造咗「中國電影的神話」。

雖然《戰狼2》喺大陸票房大收，但係睇返香港嘅售票情況就似乎唔係太踴躍，好多場次都只係有少量座位賣出，但係唔知係唔係因為早場票價比較平嘅關係，有唔少地區戲院嘅早場寧寧舍舍有幾排座位全滿，特別係喺元朗嘅戲院，連續兩日早場已售嘅座位有九成相似，之但係呢類「主旋律」電影，喺大陸上映後都有唔少公司或機構會包場叫員工睇，到底今次喺香港上映係包場定咁啱就真係冇人知喇。

而《戰狼2》喺電影評分網站imdb嘅分數都唔弱，10分滿分，佢有6.8分(2015年嘅《戰狼》就有5.4分)，有份評分嘅，男性有1,060人，女性只係有244人。俾10分心心眼滿分嘅，佔36.6%，俾1分嘅佔9.8%，根據imdb個分析，俾10分滿分嘅，其中兩個係聲稱未夠18歲嘅女性。