「超人」李嘉誠旗下上市公司與「小小超」李澤楷旗下電盈（008）噚日都舉行股東會。幾年前嘅電盈股東會，識睇一定要睇電盈忠實股東兼「電盈小股東大聯盟」代表陳仲翔「大戰」李澤楷（Richard）。但自從Richard 2016年搞咗免費電視ViuTV之後，就已經再見唔到「大戰」場面，當年「世紀一握」之後，陳仲翔直頭做埋Richard粉絲。

三子之父冇回應

繼上年同Richard一齊大讚Now TV節目《政情》之後，噚日股東會陳生一嚟就讚ViuTV，自爆自己同阿女有上過去參加節目，指一班工作人員製作節目幾咁認真云云。講講吓，佢好似去咗補習社咁，問Richard點樣教女，話阿女嚟緊轉去讀直資英中女校，點樣先可以學好英文。身為三子之父嘅Richard冇喺會上答佢，只係叫公關安排佢哋得閒飲茶咁話。
想當年，陳生問Richard會唔會親自上《跟住矛盾去旅行》，Richard仲話「唔知會唔會有一日製作同事，會邀請你同我一齊去旅行，呢樣我可能會考慮。」今時今日，唔好話個節目已經唔存在，兩位連矛盾都冇晒，陳生梗係冇得同Richard去旅行喇。
講開又講，陳仲翔另一身份係民建聯成員，佢2015年帶過當年讀小四嘅女兒去立法會力撐TSA，數數手指，確係升中了。

李華華
mailto:[email protected]