講出來難免傷感，不過事實亦需面對。亞視免費電視牌照今年三月底到期，月月出糧如坐過山車而且例遲嘅亞視員工，噚日先至出晒糧，但仍然前路茫茫。

今日亞視由營運總裁馬熙同股東代表何子慧帶隊參加百萬行，善心可嘉。雖然冇咗甚具明星相又親切嘅前執董葉家寶，而且夾夾埋埋都係得廿人左右，不及新城一半，但仍有不少市民為之打氣，起步時有市民大嗌:「劉錫賢！」、「堅守崗位！」其實係感動嘅。

張家瑩同亞視份約農曆年前就屆滿，亞視依家都仲未搵佢傾約。之前亞視宣佈話要做四日農曆賀年節目live，家瑩都放過風話想做，甚至因為咁而主動放風話想續約，但依然冇人搵佢傾。佢話:「我都好想繼續做，但如果因為合約問題冇得拍，我都冇辦法。」

講到話今年可能係亞視最後一年行百萬行，家瑩仍然樂觀:「其實都唔知會唔會，我都參加咗好多年，每年都必須出席。就算今年係唔係都好，我都會好努力咁行落去，始終都係公益事。」又話好開心可以見到啲同事，因為平時都好少撞到，總係各有各忙。

但亞視廿人今日vs影大合照成癮嘅無綫百人，似乎相對較失色，家瑩仍難免流露一絲羨慕之情:「其實團體活動如果人多有士氣就會開心啲，希望公司簽番多啲人。」吓？

家瑩又話葉家寶今年去咗旅行，所以今日未能支持。