通常發展商想個樓盤快啲賣清光,都會搞代理銷售比賽,用一招「重賞之下必有勇夫」嚟鞭策經紀,代理多勞多得之餘,個盤又賣得快,一家便宜兩家着。長實早排搞咗個四月份畢架山一號銷售大獎,邊間代理行喺上月做得最多成交,就可奪得二十萬銀獎金,以示獎勵。
比賽為期一個月,鬥足三十日。到咗最後一日夜晚九點幾,幾間代理行中,中原做得最多單數,一直領先,諗住個獎無走雞,成班中原高層就拉隊去慶功。點知,利嘉閣就喺距離凌晨十二點比賽結束前一刻,做多咗一單,贏個馬鼻。所以話,比賽嘅嘢,未到最後關頭,真係唔知鹿死誰手。
新地商場母親節派錢
為咗刺激商場人流,新地由聽日開始到十一號,推出「400萬元大激賞」計劃,以送錢、送禮品同埋泊車優惠,吸引市民喺母親節同埋佛誕假期消費。
重頭戲係大抽獎,只要喺新地旗下十二個商場購物滿三百元,可參加大抽獎,獎品係一千元購物現金券,名額六百個,其他獎品包括「呵護三寶」、消費優惠券、額外一小時免費泊車券等。新地旗下商場包括沙田新城市廣場、銅鑼灣世貿中心、旺角新世紀廣場同將軍澳東港城等。
另外,新地聘請嘅五百位抗炎大使,未來幾日就會開工,專責喺新地旗下商場為客人開門、㩒𨋢同埋消毒公眾地方。