當年今日
關於我們
隔牆有耳:鬍鬚曾收風順道做騷 - 李八方
蘋果日報 2008/12/23 00:00
鬍鬚曾帶埋太太去觀塘apm購物。
政府新聞處圖片
消費托市係近日高官指定動作,煲呔、唐唐先後行街shopping,噚日輪到鬍鬚曾上陣,佢同太太去咗觀塘apm,兩公婆又買又食,更特別幫襯茶餐廳,方便同小市民吹水,聽取民意第一手資料。
特首豪爽花錢,唐唐購物都唔手軟,相對之下鬍鬚曾比較克制,買咗件運動風褸同波鞋,又買咗啲中式餅,至於點解唔買唐英年至愛菠蘿包,八方不作揣測,大家自行判斷。
鬍鬚曾巡區唔係只為消費,同時都為預算案收集市民意見,佢實地視察喺觀塘率先推行嘅鄰里支援幼兒照顧計劃,政黨認為呢個計劃好成功,有助創造就業機會,值得全港推行,鬍鬚曾睇完唔知認唔認同。
白鴿黨噚日同鬍鬚曾見面,就來年預算案提交意見,據講白鴿黨事前做足功課,曾請教經濟學家王于漸、練乙錚等,提出一個聲言最「慳」嘅預算案建議,既唔要求政府派消費券,更冇建議全民大抽獎,主要提出資助中產嘅貸款計劃,鬍鬚曾聽到唔使開倉派糖,好受落咁話。