利世民好少賭錢，唔係怕輸，係怕上癮。有到過賭場的朋友，相信都會見過莊家派畀賭徒用嚟紀錄牌局結果的小紙條，就會話真係魔鬼嘅發明。要知道每個賭徒自信有一套必贏方程式，佢哋舖舖都會將結果記落嚟，之後好用心機咁計，計好咗就充滿信心咁落注…最後，輸清光！
呢啲賭徒會覺得世界對佢哋好唔公平，佢哋落過苦功去鑽研條方程式，又小心翼翼去做紀錄，但係最後都要輸清光，你叫佢哋點會服氣？不服氣的賭徒，一係講莊家做手腳，結果佢哋就花更多時間同心機去鑽研必贏方程式，亦將更多血汗錢送到莊家手上，這些就是我們所謂的病態賭徒。
賭場裝修富麗堂皇，加埋其他種種開支負擔咁大，又點會做蝕本生意畀你班賭徒搵食呢？日日喺賭場打滾嘅病態賭徒又點會唔知道呢？不過個個賭徒都以為自己聰明過人，只要自己一個人贏錢咪得囉！不過佢哋無諗過，每個賭徒其實都懷有同樣心態，不過最終贏嗰位只不過係運氣好。毫無疑問有個別幸運兒，偶爾賺到蠅頭小利，不過我哋知道市場裏沒有不勞而獲這回事，所以大家要搵大錢只得一個辦法︰不賭就是贏錢！