36歲嘅陳冠希（Edison）自出道以嚟，緋聞不絕，不過上年5月Edison被發現同中國名模秦舒培拍拖斷正後，似乎修心養性咗，仲有人稱其實佢哋當時已經拍咗拖一年。

今年初，《蘋果》收到風，Edison喺上年8月中，斥資約2,250萬港元喺LA築愛巢，計番時間，當時兩人只係拍拖一年多少少，甚至有消息話秦舒培已經有咗，仲就快生得。

點知到咗今年4月，一直選擇低調嘅Edison未有公佈喜訊，就被網友爆料指已經做咗爸爸，第一胎係女。結果呢個傳聞，喺呢個月終於得到證實，因為Edison為囡囡搞咗百日宴，有外籍朋友就將派對相上載上網，而牆身仲有「ALAIA'S 100」橫額，即係囡囡個名叫Alaia。