港股噚日再跌202點，跌破10800，收10797。又係中移動（941）累事，股價挫逾5%，市場憂慮內地會放寬電訊收費價格調控幅度，增加市場競爭。
雖然呢兩日發咗唔少輪，所涉及嘅資金高逾50億元，不過能夠成功配售畀炒家嘅實在唔多，發行商現階段只係印咗一大堆公仔紙喺度，當呢批公仔紙真正出街時，發行商至會喺市場吸納或沽空正股，所以發輪嘅威力仍未浮現。

利豐逆勢造好
市場傳美國大型零售商Kmart擬申請破產保護，呢次美股同港股想反彈都幾難。利豐（494）將會係被勁掟嘅對象之一，但噚日重升2%，收9.95元。
大劉近期頻頻增持廣生行（189），枱面上已見佢買入合共3136萬股，似乎有啲嘢搞緊。黑客話此股旗下太原街重建項目，可能會有外資入股合作重建，到時或者會刺激股價急升。不過，大劉親自入市吸納，照計間公司都唔會喺董事買完貨之後就立刻公布利好消息啩？
辰達永安（1189）噚日急挫9.5%，收3.8仙，成交336萬元。市場傳隻股打算配售，同時亦有傳聞話大股東等錢使可能再減持，公司正副主席上個月21號曾減持8593萬股，每股介乎0.05元至0.054元。
中建數碼（1169）今起改名海爾中建，隻股喺0.40元附近徘徊咗幾日後，成交開始增加，似乎想開車，噚日升3.7%，收0.42元。