叫年輕人要有儍勁

蘋果日報 2017/02/21 00:00


達明一派當年的歌曲影響很多年輕人,問到怎看現今年輕一代?明哥說:「如果我有後生一代,會畀佢好自由做好多嘢,我覺得我哋對年輕人好苛刻,譬如講雨傘運動,我哋應該讓年輕人有勇氣闖新世界,唔好咁容易去批評佢哋,冚熄佢哋啲火,我聽到謝安琪《家明》呢首歌,感受係畀多啲希望家明尋找理想,因為我哋曾經後生過,知道要有儍勁。」
問到後生時有甚麼儍勁?明哥笑說:「做達明一派。」阿達都說:「係啦,儍儍哋,嗰時邊有人組band,最多都係參加新秀。」明哥:「我哋做嘅音樂同主流唔同,形象又古靈精怪不男不女,趁後生做啲儍嘅嘢。」