當年今日
關於我們

【李八方online】6.2食麵撐記者 艱難時刻要企硬

蘋果日報 2019/05/31 00:00

新聞工作者逃犯條例盛記麵家眾新聞李八方ONLINE

新聞界為市民追求真相,往往被特區權貴指控為曲解,好似會將 港人 送中嘅《逃犯條例》,新聞界爭相報道番各界憂慮,點出條例對港人甚至對 香港 的壞處,卻被保安局局長李家超直指「唔了解」,可見新聞界嘅工作環境幾咁艱難。但係難極,都要企硬,沙田瀝源邨盛記麵家都係咁話!
盛記7年前開始每年揀1日義賣,幫助社會不同階層,今年揀咗網媒《眾新聞》為援助對象。八方問過麵家義工團成員B哥,佢憶述7年前見到有相熟食客為日本3.11地震流淚,咁就諗下有乜可以幫到手?結果決定捐出1日生意額畀宣明會協助災後重建,其後義賣對象先後有教會組織、沙田各地區組織及學校等等,主要都係揀啲細組織施援,「大機構大把錢,我哋就幫小眾出下力」。
由於同資深傳媒人岑倚蘭相熟,同時亦覺今年嘅政治環境下,傳媒嘅環境好艱難,「企硬嘅人少,肯出聲嘅人亦少」,所以決定今年義賣對象係以訂閱營運嘅網媒《眾新聞》,藉此向新聞工作者鼓勵一番。
麵家會喺6月2日即係星期日舉行義賣,當日上午9點至下午3點嘅收入全數捐畀《眾新聞》。《眾新聞》更為活動推出面額50蚊嘅堂食麵券,憑券可以當日去麵店食麵,或購買現場其他義賣物品,甚至保留至年底前用都得。
empty