對於有報道指,新地遇上資金壓力,聯席主席郭炳聯反駁,集團單是國際金融中心二期今年的租金收入就超過30億元,負債比率為17%,暫時無集資需要。雷霆亦指,集團已將今個財政年度的售樓目標,由280億提升至320億元,涉及單位3500伙,其中1100伙,約52億為內地項目,本港項目則佔268億元。
郭炳江補充說,香港及亞洲地區樓市不受外圍經濟因素影響,預料明年中國經濟能保持8%增長,帶動資金流入香港樓市,「內需好強,酒店及零售好好,在通脹高嘅情況下,大部份資產都會轉向物業市場。」他又指,公司會繼續原有的發展計劃,「會繼續吸納土地,拎到賣樓紙會賣樓,會投標、會舉手、會同港鐵合作,會補地價。」
對於打工仔最關心的加薪問題,郭炳聯表示新地員工肯定會加人工,「但要睇吓行家嘅加幅,要睇市況。」郭炳江亦補充說,「人工一定有得加,花紅肯定唔少過上年!」新地現時聘用超過3.5萬名員工,如獲加薪,肯定會對社會帶來正面作用。