當年今日
關於我們

【正式休息待產】周汶錡母子影大肚寫真 讚Jacques有做Model天份

蘋果日報 2017/02/25 18:35

周汶錡

周汶錡(Kathy)今日喺銅鑼灣出席畢加索藝術展開幕儀式,噚晚Kathy喺Ig貼咗張攬住囝囝Jacques嘅黑白大肚寫真相,母子齊齊全裸上陣,佢笑言:「想留過美好回憶,0依家隨時生得,因為3月頭預產期,所以同Jacques一齊影,唔係刻意暴露,想有自然帶母愛嘅感覺出嚟,效果覺得好靚。」
Kathy笑言今次想表達母子關係感覺,所以冇預老公,講到嗰日拍攝情況,佢話準備定iPad同糖果0氹囝囝,仲讚佢有做模特兒潛質:「起初以為佢唔敢影,助手喺身邊氹佢,叫佢扮瞓喺我身度,佢即刻瞓喺我度,好乖。」講到就快生得,佢話:「比第一胎更緊張同心急,因為知道生仔係乜嘢事。」至於BB嘅性別,Kathy依然賣晒關子,問佢有冇準備BB衫畀囡囡時,佢就笑言:「我有話過生女咩?唔講仔定女,賣個關子,不過冇乜所謂,當日買畀囝囝啲衫,都係白色為主,自然顏色,我好環保,好多衫係朋友畀我。」Kathy仲話完咗呢個活動,會休息待產!