【新三人行】阿女同法籍新男友夾得埋 梁芷珊:新世代好叻
足總梁芷珊辛尼迪Olivier Elzer羅樂桐
足總董事梁芷珊、國際米蘭名宿辛尼迪、明星足球隊成員、魏秋樺、傳家俊、蘇慧恩等,噚晚喺九龍灣出席「足球倡教育 激情新世代」開幕發佈會,梁芷珊透露最近開新公司,忙於搬新寫字樓,而喺英國讀書嘅15歲囡囡羅樂桐,最近放暑假返港,要做兩份實習工作,其中一份就會喺佢公司幫手,芷珊話:「我捉佢入我公司做幾個星期學吓嘢,佢寫嘢好好,想佢試下,另一份就係工律師樓做實習。」至於囡囡將來畢業後,想佢接管生意定做律師?芷珊就話:「佢自己都係未諗到做咩,我建議佢做一啲同寫作有關,佢好有耐性,剛考完會考,等佢做完晒所有工作想一齊去旅行。」
去年同羅傑承低調離婚,結束15年婚姻關係嘅芷珊,新戀人係法藉名廚 Olivier Elzer,問到男友係咪一齊去旅行?佢話:「唔知佢得唔得閒join,未有好多計劃。」囡囡同男友夾唔來得嚟?佢笑話:「o依家新世代好叻,明白只要父母關係好就得,仲有好多未知數,但都接受嘅,好似用朋友方式相處,無話接唔接受,阿女有修法文,可以同男友用法文溝通,我只係叫佢唔好教阿女講粗口,因為我唔識法文,唔知佢哋講咩,但就唔好教壞個女。」會唔會自己都學法文?佢就話只要唔使考試,咩都想學,但就算要學語言都先學普通話。
精選娛聞,喺晒《娛果》
http://fb.com/appledailyent