新車速報:
現代SantaFe2.4 換偈售14萬

蘋果日報 2002/01/11 00:00


近年愈來愈多用家追捧越野車款,皆因外觀剛勁吸引之餘,車廂又夠闊落實用,大可媲美中型轎車配備㗎!有見及此,韓國現代新近推出咗SantaFe2.4型號,除保持原有四驅車嘅外觀,極具吸引性外,反而部車卻刪減咗原有四驅系統及部分豪華裝備,演化成實而不華嘅CityRV車;以唔到14萬嘅車價,便可擁有一部咁實用嘅代步車,又確實係幾有吸引力噃!

記者、攝影:陳偉林
新一代CityRV姿采
SantaFe甫推出初期,響歐美地區經已大行其道。然而,絕大多數用家卻鮮有用上四驅裝置,僅將之作為日常代步嘅CityRV車。故此,廠方最近給SantaFe加添呢部2.4公升新版,並減去四驅裝置,反而更能突出本身CityRV嘅身分,賣相又見剛勁獨到,好有一分吸引力㗎!


實用取勝配搭齊
車廂改用上高級絲絨鑲嵌,雖然稍欠一分豪邁觀感,惟實用感覺則大增,加上車廂寬闊好用之餘,尾排重可以收摺放平,騰出闊大嘅空間;再者,除備有四門電窗、門邊電鏡、中央門鎖外,重有原廠冷氣及單碟CD音響組合,還有外置12V電插座及雙安全氣袋,設備亦可算係應有盡有。


新偈好力反應佳
新車用上一台2.4公升直4DOHC新偈,動力輸出澎湃有力,兼且重有運轉暢順同隔音出色嘅感覺。或許,刪減咗恒式四驅改用上前輪帶動設計,每有起步加速,更予人有反應敏捷之感呢!再者,出眾而穩健嘅底盤配搭,走彎亦見有出色嘅循迹性呢!
記者試後簡評 優點 外形: 賣相前衞,好有新一代CityRV風格。 車廂: 全以實用為主,空間闊落。 設備: 精簡配套,着重日常需要,設施亦尚算充裕易用。 操控: 新加入2.4公升直4偈,以前輪驅動;另配合一套5前速手波,夠氣有力。 缺點 1. 刪減咗原有越野車配搭,實為一部中級代步轎車。 2. 僅得手波裝備,實在難以普及。
現代SantaFe2.4GL規格 引擎: 2351cc直4DOHC 馬力: 145ps/5500rpm 扭力: 20.4kgm/4000rpm 傳動: 5前速手波,前輪驅動 懸掛: (前)麥花臣支柱;(後)雙搖臂 制動: (前)透氣碟;(後)碟式(ABS) 輪胎: 215/70R15HankookRA07 尺碼: 4500×1820×1675mm 軸距: 2620mm 新車售價: $139,800 車輛提供: 太古亞洲汽車(25272777)