中紀委噚日證實深圳市長許宗衡涉嫌嚴重違紀，正接受調查，咁啱得咁蹺，我哋嘅廉政專員湯顯明噚日率團訪粵，同廣東省人民檢察院檢察長鄭紅開會。
廉記話，雙方主要探討金融海嘯下兩地個案協查同加強合作防貪，研究項目包括工程建設、公共採購同公務員誠信等。

深化反腐倡廉合作

八方聽講，雙方喺會上雖然冇直接傾個別案件，但湯顯明表明，為應付金融海嘯，省港兩地都投入巨額資金搞基建同經濟，雙方有需要擴大深化反腐倡廉嘅合作。大家都知，大型基建項目往往係貪污溫床，香港同珠三角嘅合作項目隨時牽涉其中，廉記應該實啲。
煲呔今日提早開行會，因為會後佢要去廣西出席「第五屆泛珠三角區域合作與發展論壇暨經貿洽談會」，出發前會就近日市民關心嘅事向記者講話，六四、7.1？小小超生仔？都唔係，八方估計關於許宗衡。
港府噚日下午發表聲明，表示注意到許宗衡被查報道，但強調深港已奠定穩固合作基礎，暗示唔驚換人，不過中國官場人走茶凉，兩地合作冇可能不受影響。