當年今日
關於我們

【處女演出】攬張建聲又咀又喊 牛雜妹演技獲讚

蘋果日報 2015/08/12 06:00

蘋果香港處女張建聲即時牛雜妹紙說愛李美棋

「牛雜妹」李美棋嘅處女演出終於有得睇,佢早前同張建聲為商台DJ余迪偉嘅新書,拍微電影《紙說愛》,牛雜妹喺入面瞓身演出,同飾演一腳踏兩船嘅賤男張建聲扮情侶,兩人有唔少情侶間嘅互動,好似甜蜜換燈膽、梳化依偎談情等等,當然唔少得仲有錫面同埋床戲啦!

牛雜妹仲有場喊戲,表現不俗,張建聲就讚話:「我覺得拍得幾有feel同埋剪得幾好,作為新演員嘅牛雜妹,第一次演出已經非常好,又要處理激情戲甚至文戲,我覺得佢將來會係一個用心演戲嘅演員。」

牛雜妹話當日處女拍戲好緊張:「我初次拍攝都有啲緊張,但導演、工作人員同Justin(張建聲)都好錫我好肯教我,所以成個拍攝過程我都相對容易投入同放鬆,拍到親熱戲份時都有啲怕醜,但我都同自己講要令自己代入角色盡量自然。」

佢又話最難係要拍喊戲:「不嬲以為自己情感豐富,易喊嘅人拍喊戲應該冇難度,但真正roll機拍攝,要顧及多角度拍攝同埋各種情況,要長期keep住個情緒真係唔容易,希望自己系將來會更有進步。」

今次執導微電影嘅導演翁子光揚言,當初經副導演介紹牛雜妹時,佢完全唔知對方背景,淨係覺得佢係圈中少見嘅鄰家女孩。翁子光亦都好欣賞張建聲嘅壞男人演出,覺得佢可以做以前萬梓良嘅角色。