馮小剛今年初開拍《手機2》再度觸動前央視主播崔永元神經，搞到佢大爆影視圈經常以陰陽合約嚟瞞稅，而呢部戲幕前後人員都如馮小剛同女主演范冰冰都成為佢嘅爆料目標，稅局都開始查藝人有冇逃稅，范冰冰傳俾稅局一度軟禁，馮小剛知道冰冰出事後，自己就靜俏俏離開北京，一直留喺香港住。而傳聞佢同冰冰都會遭封殺，但消息未得到証實，之不過賈樟柯嘅新作《江湖兒女》今日喺內地首映，發現馮小剛戲份全部俾人剪晒。

佢喺入面飾演一名醫生，戲份約有5分鐘，之前海報都有佢大頭，但最近出嘅海報就唔見咗佢個樣，戲份當然刪清光啦！之前喺康城上映嘅版仲版本仲保留咗馮導戲份，但內地上映嘅版本就全部消失，有記者問賈樟柯點解會咁？佢話：「一言難盡，五味雜陳。」似乎有難言之隱。

精選娛聞，喺晒《娛果》
http://fb.com/appledailyent