陳國峰今日去到新城宣傳四月中舉行嘅音樂會，佢話預計農曆年後就開始排練，o依家就係揀歌階段，佢話想揀啲喺成長中影響自己嘅歌，所以會由中學階段開始揀起：「都有壓力，翻唱人哋嘅歌好聽就好正，唔好就變成口水歌，我希望開騷前派到一、兩首歌。」佢透露頭炮歌曲差唔多收到歌詞，希望月底前派台，另一首就會喺個多月後推出。

問到開騷時會唔會擔心忍唔住喊？陳國峰就好肯定咁話：「120%會，大家知我眼淺，當年比賽我係最脆弱隊長。」他又笑指只要當晚現場反應好，若然有觀眾夠膽上台的話，就會畀對方剝衫，但只限剝上身。

另外，今朝去完珠海為農曆年舉行賽車慈善賽視察場地嘅黃致豪，一返香港就接受薛家燕訪問。之前家燕姐大爆同湯洛雯拍新春節目嗰陣有唔少男士嚟探班，但有份拍嘅黃致豪就話唔覺眼，但就指湯洛雯不停向各位師傅問愛情運同點擺桃花陣：「我梗係唔使問愛情運，問家宅、事業同小朋友學業。」

對於政府剛宣佈建議幼稚園同幼兒中心因流感停課七天，致豪分別有四歲大女兒同兩歲大嘅仔都包括在內，問佢點安排活動畀仔女，佢就笑指叫佢哋探自己班，原來李居明曾批一對仔女八字旺佢：「我一定對佢哋好好，我諗住靠晒佢哋。」

精選娛聞，喺晒《娛果》
http://fb.com/appledailyent