車路士嘅油王班主阿巴莫域治呢排好心煩,球隊近仗連接輸波不特止,佢喺車路士球會總部嘅辦公室喺星期一亦遭爆格。
班賊真係神通廣大,佢哋竟然可以避開晒車仔總部森嚴嘅保安同埋閉路電視,但只係偷咗幾部高級行政人員嘅手提電腦,包括油王嗰部,其他嘢就郁都冇郁過。連調查今次事件嘅警察都話:「賊人好專業,而且只係偷電腦,好明顯係有目標嘅!」咁嘅情形令我諗起水門事件。
阿巴莫域治梗係好嬲,但佢話唔知班賊嘅目的。計我求大俠話,阿巴莫域治之前俾俄國政府調查,呢啲唔通係俄羅斯秘密警察嘅所為?而且,保安咁森嚴都俾人偷到嘢,唔通好似《無間道》咁,車仔有內鬼?
哈化淪落護級球員罰減薪有理
柏林哈化喺德甲上半季踢得好差,𠵱家排喺尾二,下半季要為護級而戰;哈化高層為咗懲罰班球員,諗住減佢哋人工,其中匈牙利中場戴達就表示冇異議。咁又係,多蒙特出唔到線踢歐冠盃分組賽,佢班球員即刻要減薪;哈化咁淪落又係減薪,試問佢班球員又點敢SayNo呀!
史特加好威球員排隊攞獎
德甲聯球會史特加雖然保唔住個冬季冠軍,重要跌落第四位,但佢哋班球員就逐個威威。繼德國門將希迪布蘭打破簡尼嘅德甲最長時間不失球紀錄,同埋薩碧斯攞咗匈牙利足球先生之後,希比亦當選今年白俄羅斯足球先生。佢班球員咁掂,唔怪得之成為歐洲其他大球會嘅獵物啦!