電影《十年》拿下今屆金像獎「最佳電影」引來正反激烈爭辯，寰亞電影老闆兼全國政協委員林建岳更在當晚即發稿予傳媒，指《十年》得獎是「香港電影界的不幸」。

林建岳今日於now訪問中繼續狂轟《十年》:「如果我話畀你聽，有一間雲吞麵店係全香港最好嘅餐廳，你會唔會服氣？一個新嘅導演，第一部戲係咪會好過啲徐克、最佳導演，係咪好過佢哋拍嘅戲呢？大家真係見仁見智，對我嚟講，我唔承認。」又話唔應該因為電影題材吸引就獲獎，認為金像獎有需要商討改變評審機制。

《十年》單元《自焚者》導演周冠威回應到:「其實有啲疲累o架啦覆呢啲言論，唔服氣係冇問題嘅，你自己一個人唔服氣，但如果要個機制要因為你而改變，呢個係有啲問題，而正正我哋香港唔能夠陪啲在上位者，因為佢哋唔服氣而改變規則o架嘛，如果係咁嘅情況去改，反映到呢一種思想令到香港敗壞。」