香港演藝人協會早前被揭疑有人「穿櫃桶」竊600萬，搞到要報警處理。前晚邵音音喺九展出席電影《醉夢英倫》（Spandau Ballet: The Movie）首映時忍唔住呻話：「其實好多年前已經同曾志偉用心良苦講過，但佢唔信我。點解唔信？梗係唔好聽啦啲嘢。」佢仲話之前個會啲數已經好亂：「太隨便，佢（志偉）覺得個會好細，使唔使咁緊張。（係咪志偉太信人？）係呀，我哋好多人都知道，某啲人係非常唔好、唔可信，但佢覺得我好儍、好是非。」

開會冇被通知

問音音姐覺唔覺得有啲人係一早有預謀？佢話：「梗係有啦！但志偉覺得我諗多咗。」問到係咪有人私下搞活動攞着數？佢話：「不嬲有幾個人係咁，個會得21個人，得我同黃真真反對，所以不了了之。其實我哋都知知哋，但就攞唔出證據，總之就一筆爛賬。」
之後邵音音希望盡量選到一啲唔識嘅人，「呢間係有限公司，係周潤發、成龍、梅艷芳、曾志偉、譚詠麟、張曼玉佢哋幾個好辛苦經營，亦搵咗律師制訂公司法去保障個會，但有人唔照住公司法去做，都冇人聽我講，之後開會直情冇通知我。」諗番成件事，都應該幾激氣？音音姐話：「我唔激氣，因為之前已經講過，係預料中嘅，好多理事知道，都唔可以為會講嘢，索性唔出聲唔做，𠵱家件事交畀警方及律師處理，更加唔可以講嘢。」
撰文：馮仁昭