潮流興削佣,多間發展商近排一窩蜂削減代理佣金,個別甚至唔請代理幫手賣樓。
長實同新世界土瓜灣傲雲峰一於反潮流,噚日請七大代理出席記者會,為即將開售第三期造勢,場面墟冚嘅誓師會,近排好少見。
發展商重特別強調,個盤到現時為止,代理佣金支出超過四千萬,佔套現金額大約百分之一點二。
各大代理都好識做,除咗各區高層同旗下經紀空群而出外,每間代理重特別派出經紀女將做代表,一改傳統誓師大會陽盛陰衰局面。
十人組成嘅地產界女將,當然唔會擘大喉嚨嗌口號。佢哋好似選港姐咁,一字排企好,每人揸住個牌,讚兩句個盤有幾正,說明個盤質素及銷情皆十全十美。
代理呢招回敬發展商嘅支持,睇嚟都幾受落。
地鐵監察租戶
商場租戶係大業主嘅金蛋,所以大業主除咗搞活動,幫商場吸引消費者,對租戶營業狀況都好關注。
地鐵總商場市務經理陳嘉明話,佢哋有份watchlist,可以睇到每個租戶生意做成點,假如唔好,就會睇吓有乜嘢可以幫到佢,抑或決定,呢個租戶約滿要離場。原來做地鐵商場租戶,壓力好大。
不過,為鼓勵租戶,地鐵搞獎勵計劃,每月頒發獎牌,畀做得最好嘅租戶。年底會送出現金大獎,分零售同飲食兩類,每類名額十個,送出獎金逾百萬,等租戶可以同員工一齊分享。