喺上一次專欄度，我同大家講網上自學，希望大家可以善用網上唔同嘅資源，畀自己仔女探索學校以外嘅科目，以自己興趣行先嚟搵嘢學習。份稿出完一個禮拜都唔使，就已經即刻爆咗個活生生嘅例子比大家去參考。

打機、睇動漫、砌模型，呢啲係好多人眼中都係無聊嘅活動，拎嚟燒下時間啫。雖然我哋係咁諗，不過喺香港人成日返嘅「鄉下」，日本人眼中就唔係咁簡單喇。喺呢段大家都困喺屋企嘅時間入面，日本有個小學生喺YouTube睇片學咗一個叫 Blendr 嘅 3D繪圖軟件。佢只係睇完片之後就畫咗動漫《鬼滅之刃》入面嘅場景「無限城」出嚟。係！你冇睇錯而我都冇打錯。係一個小學生！讀者們如果唔知「無限城」係咩樣，我建議你Google一下之後就會明白晒同讚嘆呢位小學生嘅能力。

Twitter 連結
P.S. Side Track一下，鬼滅個尾真係爛到作為fans嘅我都幾傷心下。

迷上一套動漫，然後平時畫返出嚟係一回事。我相信大家細個都有追過下劇，追過下漫畫，然後間唔中就畫返啲人物角色或者場景情節出嚟，靚唔靚就當然係另一回事啦。但係我哋之中有幾多個真係會為咗畫套漫晝或者劇入面嘅元素而去學一樣新嘢先？

就好似我上次咁講，網上教學嘅資源真係多到你學極都唔完。咁我哋又應該點樣去揀嘢嚟學呢？可能大家都有聽過呢兩句說話，「無聊的事認真做」，「任何事做到極致就是藝術」。第一句係我身邊做運動嘅朋友成日講，第二句就係發哥喺《無雙》套戲入面嘅對白。呢兩句說話同日本嘅「職人精神」其實係好配合嘅，而興幸係香港都慢慢咁聽到人去培養「職人」呢個身份。

呢種精神並唔係建基於佢嘅興趣搵唔搵到錢而開始，而係從清楚咁了解自己嘅熱情喺邊一方面，然後努力去磨練自己嘅技術，以推動技術傳承為目標，全心全意咁去做一件事。當然，喺香港咁嘅環境底下，自己都未養得掂就去追呢啲嘢，真係諗住自己靠光合作用就生存到咩？退一步咁睇，唔使你一定要將興趣當飯食，但係最起碼要知道自己嘅熱情喺邊度。好多時我教班嘅時候都會問學生，你平時有咩興趣，鍾意做啲咩？而好多時候學生都會答我打機、睇劇、做運動咁囉，但係當我再深入咁問下一啲follow up question 時，好似係「你鐘意咩類型game呀？點解鍾意呢類型嘅劇呀？」，呢啲比較多涉及自己諗法嘅問題，佢哋就未必可以好完整咁答得出佢地嘅個人見解。

其實我明白家長都係唔想小朋友太沉迷喺呢啲課餘活動而影響學業成績，但係試問如果你唔沉醉喺一樣嘢入面，你又點會有興趣去進步、去研究呢？所以我希望家長們可以明白，沉迷一樣嘢並唔係一件壞事。從中如果可以幫到小朋友順便學習下點樣分配時間，家長不妨可以放縱下比小朋友去真正咁沉迷落一樣嘢度，話唔定佢第時嘅成就就係由而家開始醉心研究自己嘅興趣而起步嫁喇﹗

---

矽日生
一個由細到大都讀書唔叻嘅教育人。廿零歲出嚟創業，跌跌碰碰入咗NGO教學生做創業家唔一定要做老闆。屋企無貓嘅貓奴，打機好廢嘅90後 。

歡迎留言向筆者發問及交流：按此留言