根據權威雜誌《福布斯》（Forbes），截至今年7月10日，美國微軟創辦人之一保羅艾倫（PaulAllen）嘅身家，估計總值180億美元（約1396億港元）！有咁多錢，用嚟做乜，梗係砌好隊波爭NBA總冠軍啦！

拓荒者去季喺NBA季後賽西岸首圈有驚喜，以總場數4:2淘汰實力較強嘅快艇，可惜喺四強遇上勇士，結果場數輸1:4出局。身為拓荒者班主嘅保羅艾倫，梗係想球隊繼續進步啦，佢亦唔係孤寒財主。6呎6吋後衛卡拉比（AllenCrabbe）去季表現大躍進，喺常規賽上陣81場，其中有8場打正選，場均貢獻10.3分、2.7籃板、1.2助攻，三項數據都比14/15球季有進步。季後，24歲卡拉比成為有限度自由身球員，早前同網隊簽咗份4年、總值7,500萬美元（約5.8億港元）嘅合約，周日美媒報道，拓荒者者願意付出相同金額留住卡拉比。另外又會同7呎1吋、24歲中鋒李安納特（MeyersLeonard）續約四年，總值4,100萬美元（約3.2億港元）。

計番條數，兩位後生仔份約加埋要成億美金，大家可能覺得對保羅艾倫濕濕碎。但係咁喎，兩位球員都唔係球星。卡拉比極其量只係一個有啲潛質嘅「射3分，後防守」（3-and-D）球員。而李安納特去季喺常規賽上陣61場，其中10場打正選，場均只係貢獻8.4分、5.1籃板。不過喺現今NBA，球員人工越嚟越高，想留住綠葉，都要肯使錢嘅，呢啲叫誠意！