因為同彭家麗合唱，「一鳴驚人」而成名嘅朱主席朱壽仁，名就成咗，但似乎都係負面居多，好似近日邵子風就喺fb狙擊朱主席，話佢出席慈善舞台劇睇騷唔俾錢，又話佢強行攬住女演員，令該少女感屈辱。

邵子風今日就接受訪問，話當晚朱主席除咗攞咗兩張總值476蚊嘅門票之外，完場仲想攞龍小菌唱片就走。最離譜係朱主席走埋去一吓就攬住個女演員。

邵子風又話，日前佢又再不請自來，去到大台《扮嘢王》喺新都城嘅招募，仲自己闖入後台，又係未經同意就一嘢抱起其中一個負責幫參賽者化妝嘅少女，據邵子風所講，少女覺得好屈辱。

邵子風仲公開呼籲，要令全世界都知朱主席嘅「惡行」之餘，仲想招來更多苦主，想一齊追數，亦都話比搞活動嘅公關知道，以後見到佢出現要列佢為不受歡迎人物咁話。佢又話自從喺Facebook公開呢件事之後，收到好多有類似經歷嘅苦主投訴，今日仲請到一名曾幫朱主席墊支嘅Halen到場。

Halen話佢兩個女都係學跳舞嘅，舊年8月兩次幫朱主席搞嘅跳舞活動表演，朱主席都冇俾出場費。最慘係Halen受跳舞學校所托，幫其中一場買花籃同材料佈置場地，總共欠成8,500蚊，但係就諸多藉口拖足成年都唔還，仲搞到Halen被其他家長誤會係食夾棍。

今日Halen就好勞氣，仲拎晒WhatsApp嘅紀錄出嚟比大家睇，佢話最緊要係證明自己清白，亦都呼籲大家唔好再被佢呃到喇。