由小栗旬主演嘅真人版電影《銀魂》即將在日本上映，香港映期都已定喺8月10日，噚日小栗旬就聯同橋本環奈、長澤正美、菅田將暉、岡田將生、菜菜緒與柳樂優彌等演員，出席於東京舉行嘅首映禮，眾星身着浴衣出席，吉祥物伊莉莎白更被抬住出場，似足舉行夏日祭典，相當熱鬧。今次亦係長澤正美自傳婚訊後首度現身公開活動。

菅田將暉提到小栗旬經常帶美食去片場，佢又讚演神樂嘅橋本環奈唔顧形象，為忠於原著挑戰挖鼻哥同嘔吐等古怪動靜。有份演出嘅堂本剛因突發性失聰停工留院，導演福田雄一話堂本剛演出嘅高杉晉助冇腳毛，本身毛髮旺盛嘅堂本剛要為角色剃腳毛，導演話腳毛放晒入透明袋已由佢保管，煩惱唔知點處理，提議開畫日派俾觀眾，現場影迷即高呼「好想要！」