古天樂、張智霖（Chilam）、鄭嘉穎、鄧麗欣噚晚喺銅鑼灣出席電影《L風暴》慶功宴，監製黃百鳴帶埋孫仔孫女到場，郭富城前日喺迪士尼酒店為愛女搞咗個生日會，張智霖同老婆袁詠儀都有份被邀出席(新聞連結： https://bit.ly/2Q0RT5r )，唔知Chilam送咗乜禮物呢？佢話：「呢啲太太負責，有好多朋友好耐冇見，都係一個歡樂嘅聚會。」講到BB囡似邊個多啲，佢話：「我唔識分，因為仲細個，不過好開心。」之但係會唔會叫城城公開阿女個樣？Chilam就話呢啲問題太私人，要問番佢先得。

有傳Chilam加價千萬續約蕭定一，Chilam笑笑口話：「未呀，仲有成年，係咪真呀？可唔可以搵番條片畀我睇？有片為證呀！」佢仲話：「我哋有傾過，好初步去傾，有好方面要考慮，o依家言之尚早，我哋連錢都未傾到，談吓心先。」

另一方面，對於有報道話鄧麗欣(Stephy)同男友喺車上纏綿拍拖，Stephy話：「冇呀，我哋只係研究食啲心嘢，嗰陣係拎住電話睇緊有乜嘢好食！」佢仲話唔會情到濃時當街錫錫：「我哋行街習慣保持距離，習慣咗一前一後行，就算公開咗都唔會高調，始終喺香港會有好多人望住，出埠去旅行可能好啲。」

精選娛聞，喺晒《娛果》
http://fb.com/appledailyent