啱啱做咗劉太嘅甘比，一直以嚟都親力親為照顧大劉同一對仔女秀樺、仲學，就算o依家做咗劉太，身家暴漲過百億，都冇改變呢個習慣。

唔經唔覺，秀樺今年已經8歲，同媽咪甘比十足一個餅印，日前《蘋果》見到甘比一家去中環嘆tea，秀樺行行下仲突然甩開婆婆隻手，追上前拖實媽咪，撒嬌扭抱，全程嗲暈媽咪！（新聞連結： http://bit.ly/2iqiW8N ）

不過睇嚟秀樺呢個聖誕假就未玩夠喇，噚日讀者陳小姐透過「爆相爆片」，話日前夜晚9點幾喺中環嘅友邦歐陸嘉年華，見到秀樺、甘比媽咪、秀樺表哥同埋一個貌似甘比家姐嘅女士，連同保鑣去玩機動遊戲。

大劉同仲學都冇去玩，甘比順理成章都要留喺屋企陪住佢哋，至於玩嘅重任，就交咗俾秀樺表哥。陳小姐話秀樺同表哥表現相當活潑，仲走咗去玩「飛天韆鞦」：「我見到甘比媽咪同佢家姐喺後面追住佢哋，最後保鑣同表哥坐一架吊籃，甘比家姐就同秀樺一齊坐。雖然我坐上去玩都驚驚地，不過佢個女睇落好似冇乜嘢，玩得好開心，玩完之後轉個頭就唔見咗佢哋！」