當年今日
關於我們

咖喱牛腩:全能是常識吧 - 牽牛

蘋果日報 2015/01/30 00:00


歐盟都已經講明QE,不過一月轉會市場仲靜過亞記電視台個錄影廠,西班牙方面,巴塞隆拿被禁買人,華倫西亞出手買賓菲加中場安素佩雷斯,已經係暫時嘅標王,以往大使慣嘅皇馬,只係買咗兩個𡃁仔,最詭異就係收購「挪威神童」,將佢放喺皇馬B隊,唔通想佢跟皇馬B隊領隊施丹(圖)學法?
如咖喱所言,進攻中場喺國際球壇地位已大不如前,施丹作為上一代進攻中場典範,孭住法國贏完世界盃再贏歐國盃,佢天生異稟有六呎一吋高,後生又學過柔道,既有健碩身軀又擁有優秀腳法。之後係就係出過唔少好嘅進攻中場,卡卡、史奈達、恩尼斯達等,但已經唔再單純喺中路發動攻勢,甚至更依賴兩翼進襲,派路、沙維都係好嘅指揮官,但又比傳統嘅「9號半」墮後一格。
其實𠵱家世界潮流興排4-2-3-1陣式,雙防中與單箭頭之間,三位進攻型中場,除咗左右兩翼,進攻中場都好重要,好似英超榜首雙雄車路士及曼城,奧斯卡杜斯山度士同大衛施華,但現實角度,進攻中場再難單單幫球隊進攻,返後協防更是常識吧!正如車仔領隊摩連奴將桑馬達放畀曼聯,並唔係佢進攻交唔到貨,而係佢懶於防守。
能跟施丹學習,係馬田奧迪加特嘅福份,據報佢年紀輕輕,已經有一份周薪十萬歐元合約,真係絕世好工。不過之前被冠以神童嘅,往往少時了了,大未必佳,希望馬田仔真係學到嘢,唔好一時沖昏頭腦浪費天才。
文:牽牛