【遺願未了】譚炳文女兒難接受老父突病逝 傷心痛哭：我好唔捨得佢
蘋果日報 2020/09/05 17:14
譚炳文肺癌末期譚淑瑩
譚炳文在今年6月確診患上肺癌末期，曾接受電療，遺願是想今年11月搞多一次生日會，惟昨晚呼吸困難，凌晨12時由白車送入律敦治醫院，延至今早11點離世，享年86歲。炳哥晚年一直由女兒譚淑瑩照顧，瑩瑩望老父走得安詳，即安排法師到醫院為爸爸誦經及準備後事。
下午1時40分，炳哥女兒由4位親友陪同下離開醫院，見有傳媒在場，她企定定拍照，欲訪問之際，她已經爆喊，待心情平復少許後才說：「我講唔出，好突然，完全冇心理準備……」已經泣不成聲。
瑩瑩透露炳哥早前表示身體不適：「唔舒服係痛嘅，咁我哋以為係啲骨痛，帶佢睇骨醫，係突然間，咁跟住發現佢係有啲cancer擴散，咁但係因為年紀大都可以做得到，咁去瑪麗（醫院）做咗電療㗎喇，電療完之後呢係唔痛，但係活動能力就弱咗，醫生話需要時間修復。」
瑩瑩指炳哥昨日曾到葛量洪醫院覆診後返家，至晚上身體狀況急轉直下：「噚日喺葛量洪嗰度覆診，醫生畀佢逢星期五去覆診，認為OK啦就返屋企休息，噚日覆診後係冇嘢，唔使住一日，因為佢都想返屋企，咁我咪湊佢返屋企囉，返到去，夜晚12點嗰陣時……唞唔到氣，冇辦法，我惟有call白車，白車送佢嚟律敦治，如果我知道佢咁樣，噚日葛量洪我就唔同佢出院，因為嗰個醫院係啱佢啲。噚晚等到3點，本來醫生都話可以返屋企先，但係今朝7點幾就話佢唞氣唔OK，要我哋即刻嚟，所以我都……」瑩瑩再度忍不住哭。
對於久病的老父突然撒手人寰，瑩瑩表示仍未能接受：「太突然未接受到，即係我知道……但我諗都可以捱到最少一、兩年，或者多幾個月，因為其實佢都有個心願，樂小姐好好，啱啱同佢簽咗約，佢好想完成埋嗰個工作，其實佢個腦係清晰，佢完全係清晰，知道你係講乜嘢，只係活動慢咗，所以我真係接受唔到囉，我真係唔捨得佢。」瑩瑩今日步出院時，手上更拿着譚炳文生前上班常孭着的袋。
瑩瑩指父親離世時，家人都陪伴在側，亦有安排法師為他誦經。至於炳哥的後事方面，瑩瑩稱仍未有安排，會先與家人商量，但多數會採用佛教儀式。
譚淑瑩今日離開醫院時，神情哀傷。（蘋果日報）
提到老父突然離世，譚淑瑩坦言難以接受。（蘋果日報）
講起亡父，譚淑瑩忍不住淚水。（蘋果日報）
譚淑瑩身上孭着亡父生前用的返工袋。（蘋果日報）
譚淑瑩坐的士離開。（蘋果日報）
-----------------------------
《蘋果》英文版免費試睇：了解更多
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於 《蘋果日報》你的優惠 網上獨家發售！