雷神即是雷神，下半場一撻着摩打，唔係人咁品，第五場贏完大熱門呂健威馬房「獵狐者」，第七場三班一哩重施故技，策徐雨石馬房「雷公鑿」大熱添食，起孖領先騎師王帶入尾場。「雷公鑿」初配雷神，這個「雙雷」組合震散對手，單Win及組合獨贏A1分別派32.5及19元。

「雷公鑿」由馬主貝鈞奇持有，此駒在港多由華人騎師策騎出賽，包括今年2月22日夥拍黎海榮贏谷草三班一哩開齋，之後一直冇再贏，跑位置則有五次之多。

呢鋪「雷公鑿」換上地上最強莫雷拉，沿途居四五位，入直路前已發力搶佔有利位置，末段順勢透出直奔終點，大勝三馬位，錄得在港第二次勝利，贏馬姿態相當輕鬆。

徐雨石開季即搶攻，剛周日兩捷加今晚暫時「雷公鑿」一Win，現以三場頭馬領先練馬師榜，不愧為馬壇急先鋒。

第七場再度開出熱頭冷腳，二至四名順序為落飛熱門「奇真」及一對冷馬「盈豐駿駒」及「家樂駿駒」，四重彩派7,233元。

今場沈集成馬房13倍之「琪麟穎」跑至半程於內欄突然失蹄，之後急劇墮退，被鞍上人梁家俊收停，沒有完成整場賽事，這匹6歲馬的情況令人擔憂。