由李民基、庭沼珉、A Pink成員普美、金玟錫等人主演嘅韓劇《今生是第一次》，現時喺韓國收費台tvN及香港Viu app熱播中，劇集噚晚播出第12集，男主角世熙(李民基飾)雖然同女主角志浩(庭沼珉飾)因為層樓而假結婚，不過兩人似乎因為住埋一齊，日對夜對下擦出愛火，前晚第11集李民基仲主動啜爆庭沼珉，好鬼霸氣。

而噚晚一集就講到庭沼珉被「老公」李民基咀完後，兩人越來越曖昧，庭沼珉對李民基嘅慾望越來越大，好想同佢有更多嘅接觸，成日胡思亂想，腦中不斷浮現同李民基接吻嘅過程。

李民基一直收起自己嘅心係因為佢曾經受過情傷，佢因為害怕再次傷害到別人，所以一直唔敢再去愛，不過佢為咗庭沼珉亦勇敢踏出第一步，仲同庭沼珉去浪漫約會，兩人手拖手十分浪漫。而李民基想擁有幸福嘅感覺越來越大，佢決定向庭沼珉打開心窗，主動提出同庭沼珉一齊瞓，唔知下周一集兩人會唔會上演床戲呢？

另外免費台方面，由鄭麗媛同尹賢旻主演嘅KBS新劇《魔女的法庭》就繼續做同檔收視冠軍，當中《魔女的法庭》噚晚播出第12集，收視升至11.9%，而徐玄振同楊世鍾主演嘅《愛情的溫度》噚晚播出第33集及第34集，收視分別有6.4%及7.3%，排第二名；韓藝瑟同金基石主演嘅《20世紀少男少女》噚晚播出第23及第24集，以3.4%及3%收視，繼續包尾墊底。

更多韓流，喺晒《娛果》
http://fb.com/appledailyent