李八方online | 林鄭都有知心友！陳淨心轟建制派撐全民檢測是「政棍誤導巿民呃like的口號」
蘋果日報 2020/12/17 16:34
陳淨心李八方online林鄭藍絲
近日建制派人士圍攻林鄭，炮轟她不肯推動強制全民檢測，「愛港行動」組織人陳淨心偏偏力撐林鄭，更指強制全民檢測只係「政棍誤導巿民呃like的口號」。
物必先腐而後蟲生。正當以「梁營」為首嘅建制派人士，近日突然蛆蟲式咁圍攻林鄭，炮轟林鄭唔肯推動強制全民檢測下，建制派偏偏就有「一女子」力排眾議，表明點都會力撐林鄭，更炮轟強制全民檢測只係「政棍誤導巿民呃like的口號」，呼籲真正愛國愛黨人士要團結對抗「『倒林』妖風」。佢就係早過已仙遊嘅李偲嫣同屈穎妍出道撐共，被網民稱為「淨心BB」嘅「愛港行動」組織人陳淨心。
愛國藍絲陳淨心力撐林鄭，炮轟強制全民檢測只係「政棍誤導巿民呃like的口號」，呼籲真正愛國愛黨人士要團結對抗「『倒林』妖風」。
雖然同屬建制派陣營，但陳淨心對林鄭忠心程度，令佢對建制中人亦「無面畀」，除咗試過喺Facebook鬧批評政府抗疫不力嘅何君堯帶頭違反限聚令聚眾集會，近日更點名炮轟早前突然自稱「不是建制派」嘅屈穎妍，指屈曾撰文稱仰慕過黎智英呢個「大漢奸」做「梟雄」係好可悲：「我任何一個男隊友都比黎智英『梟雄』，屈大媽，我人生比你幸福！」
陳淨心近日點名炮轟早前突然自稱「不是建制派」嘅屈穎妍。
對於近日梁振英同親北京傳媒狂鬧林鄭唔肯推行全民強檢測，陳淨心亦大罵圍攻林鄭嘅建制派人士係「建制政客」，剩係識「日日坐喺冷氣房得把口鬧政府唔封城唔強檢」，狠批：「所謂的全民強制檢測，只是政棍誤導巿民呃like的口號！」
自豪獲邀出席國宴：我從未被列入統戰之列，我是親生的
可能大家都好奇，陳淨心究竟為乜咁撐林鄭？佢曾經喺FB解釋：「力撐林鄭是因為我有幸被共產黨洗腦了，對林鄭堅定的支持是因為對黨堅定的信任」，更以自己曾被中國共產黨親自邀請佢出席國宴為例指：「我從未被列入統戰之列，我是親生的」，似強調自己先係真正「根正苗紅」嘅真藍絲喎！
陳淨心指自己曾被中國共產黨親自邀請出席國宴：「我從未被列入統戰之列，我是親生的」。
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！