午飯時,導演的餐桌必定設於拍攝現場最風涼水冷的上佳位置,碰巧這幾天的拍攝場地背山面海,不冷不熱不多蚊,跟同桌的手足們係咁摷啱心水的飯盒,加上茶水阿姐秘製的辣醬佐料,一面講笑、一面欣賞風景、一面嘆飯盒,只覺整個飯盒的熱量全被吸收,邊吃邊長肉。
下晝三點三,大家輪流「萬歲」,菠蘿油、蛋撻、西餅、糖水、生果如車輪般在面前轉來轉去,大夥兒都在吃,就是最能忍口的也會失守,只要咬了第一口菠蘿油,必定成個噬晒重問有冇?
收工後,先回家淋一個大浴,繼而第一件事便是搵些好嘢食,正所謂日頭猛做,冇理由唔食餐好。飯氣攻心,想起明朝又是六時通告,本想先做點睡前運動,但只一動念便又沉沉睡去。
拍戲真係會肥死人!