威權管治下，連外訪都要講權威？特首林鄭月娥係咁諗㗎，但即將應邀啟程訪美、反映香港「一國兩制」真正落實情況嘅公民黨法律界議員郭榮鏗（Dennis）一於話之你，完全無受娥特影響，準備充足，以便向當地政商界「講事實、講道理」，亦希望美方可以保持香港嘅獨立關稅區地位，以免為香港帶嚟不堪設想嘅後果。

而大家平時見到官仔骨骨嘅Dennis，對法治堅定不移，好似好嚴肅咁，查實佢都有輕鬆嘅一面，亦同唔少人一樣，都係《男兒當入樽》嘅粉絲。早前《蘋果日報》隨報附送《入樽》海報，Dennis當然都有買報支持啦，仲將海報放喺立法會辦公室，珍而重之。咁仲唔止，原來佢喺office仲有套《入樽》漫畫，亦有《入樽》主角櫻木花道為封面嘅畫冊，全部都係佢嘅心肝寶貝；自細都鍾意打籃球嘅Dennis，一講《入樽》就興奮，霎時變咗個大細路。