馬雲月初宣佈出年退位阿里巴巴主席，轉個頭就畀八方捉到佢走去秘撈做KOL！咦唔係，睇真啲，係四川馬雲──柯全壽至真！其實人家本身喺成都一個小區做保安，做做吓真‧馬雲爆紅，眼利嘅神州大地子民，就發現到四川有個同馬雲99%似樣嘅柯全壽，因為佢有撞樣呢項天賦「本領」，自此經常被路人要求合照，有啲街坊仲搞笑，出入都叫佢聲「馬哥」，仲有綜藝節目邀請佢上電視添。

今舖馬哥勁啦，Play Station都搵佢扮叢林宗師兼魔法KOL，同達哥、徐錦江、鄭子誠等人拍攝「召喚！神一般の隊友！」廣告，宣傳最強萬聖節遊戲。其實柯全壽話過，雖然人紅咗，但幾十歲人都唔想齋靠塊面食飯，所以就算有Job接，都會繼續返去做好保安份工，而且佢覺得自己比馬雲靚仔少少。八方記得馬雲講過，有啲假貨做得比真貨好，又估唔到呢句嘢用喺真假馬雲身上，都啱使喎。

立會補選新聞，《蘋果》一網睇晒
http://bit.ly/appledaily1125