前年同赤西仁奉子成婚嘅日本女星黑木美紗，前幾日先被傳完同小栗旬喺酒吧通宵談心。不過一波未平、一波又起，佢竟然同時被爆撻著咗老公嘅後輩北山宏光！仲有疑似係佢哋嘅親密合照流出o添！
有日本報道引述知情人士話，黑木喺一間酒吧度同北山宏光幽會，之後仲叫人返屋企再飲過，但之後有冇發生更進一步嘅事，就冇人知嘞。仲話黑木原來成日都用呢招o架！屋企亦都上晒彈藥，有好多酒。
爆開有條路，另外又有電視台工作人員爆黑木對大隻仔情有獨鍾，就算喺拍嘢時，有工作人員係大隻仔，都會主動去撩人哋！如果飲咗酒嘅話，仲會對人哋上下其手呀！
據聞頻頻傳偷食嘅黑木，當初之所以嫁畀赤西仁，只係因為有咗BB。o依家老公離開咗公司，前路茫茫，更加令佢想喺4月套劇出街之前，宣佈離婚呀！